Camp Boutique er hugarfóstur fjölskyldu sem lagðist á eitt við uppbyggingu á sjávarjörð sem tilheyrt hefur okkur í nokkrar kynslóðir. Eigendur Camp Boutique dvöldu þar sem börn í sveit og tóku þátt í að rækta kartöflur og gulrætur.

Jörðin, Loftsstaðir Vestri, hafði verið í eyði í ára raðir þegar við tókum okkur til og gerðum upp gamla bæinn sem hafði eyðilagst í Suðurlandsskjálftanum árið 2000 en er nú þjónustuhús fyrir okkar gesti. Þá gerðum við einnig upp gamla hlöðu og fjárhús frá um 1920 sem voru rústir einar og fundum þar magnaðar vegg-hleðslur sem höfðu gleymst undir súru heyi í aldanna rás.

Húsakosturinn og jörðin nýtur verndar Galdra Ögmunds en bein úr honum er innrammað í stofunni í þjónustuhúsinu og hefur verið þar lengur en elstu menn muna.

Við erum með tvær gerðir af tjöldum, Deluxe tveggja manna og svo stór fjölskyldutjöld. Tjöldin eru hönnuð sérstaklega fyrir íslenskar aðstæður, upphituð með rafmagnsofnum og innréttuð af mikilli kostgæfni. Það eru uppábúin rúm í tjöldunum og dýnurnar eru upphitaðar.